KidsMotherhood

potty training خطوات سحرية لتتغلب علي فوضي المنزل أثناء البوتي ترينينج

في فترة الصيف بتبدأ الأمهات  تعليم اطفالهم استخدام البوتي للتخلص من مرحلة ارتداء الحفاض

لكن الأم بتتردد كتير قبل ما تبدأ في البوتي ترينينج وبتبقي خايفة جدا لأنها شايلة هم البهدلة اللي هتحصل في البيت وانها هيتهد حيلها

تعالي اقولك الاستعدادات اللي محتاجة تعمليها قبل ما تبدأي علشان تبقي المرحلة دي سهلة وبسيطة وتعدي بسلام

(١) جهزي وجبات تكفيكي لمدة اسبوع او اثنين بحيث لما تقفي في المطبخ متخديش اكتر من نص ساعة في عمل الغدا لأن اول فترة هتحتاجي انك كل شوية تعرضي علي ابنك او بنتك يقعد عالبوتي لأنك لو مفكرتيهوش في الأول كل ٥ دقايق هيعمل علي نفسه

(٢)شيلي كل سجاجيد الشقة وخصصي غرفة واحدة تبقوا قاعدين فيها طول اليوم وافرشي مفارش بلاستيك عالكنبة وفوق المفرش ملايه علشان لو قعد وعمل عليهم يبقي سهل تشيلي الملايه تغسليها وتغيري المفرش البلاستيك

وهنا ممكن تجيبي رول من مفارش السفرة البلاستيك اللي بتستخدم مرة واحدة وتترمي علشان توفري علي نفسك مجهود تنظيف المفرش كمان

وحاولي تخلي قعدتكوا عالأرض علشان متحتاجيش تغيري ملاية الكنبة كل شوية لأن الأرض هتكون اسهل واسرع في التنظيف

(٣) هتحتاجي تشتري عدد من الاندرات لا يقل عن ستة لابنك او بنتك علشان هتلاقي نفسك في الاول كل شوية بتقلعيه اندر وتغسليه فمتلاقيش ان الاندرات خلصت ومش لاقيه حاجة تلبسيهالهم

واول ما يعمل في واحد اغسليه علطول وادخلي انشريه في البلكونة احنا في الصيف والشمس هتنشفه علطول ان شاء الله

(٤) طبعا محتاجة تخصصي فوطتين علشان تنظفي بيهم الارض مكان ما هيعمل علي نفسه واحده هتنظفي بيها وتغسليها وتفرديها تنشف والثانية تكون ناشفة تنشفي بيها الأرض علطول علشان محدش يمشي عليها ويتزحلق

(٥) اي حاجة محتاجة منك تركيز ووقت في فترة البوتي ترينينج حاولي اعمليها في الأيام اللي قبل ما تبدأي البوتي ترينينج لأنك بجد لو فضيتي نفسك لأبنك او بنتك تماما في الوقت ده هتلاقي المرحلة دي بتعدي بسرعة ان شاء الله وانتي كمان هتكوني هادية ومش عصبية علي ابنك لأنك مش حاسة ان وراكي حاجات كتير محتاجة تعمليها ومسببالك ضغط نفسي.

لأنك لو سبتيه شوية ودخلتي تعملي حاجة ممكن تلاقيه عمل علي نفسه وطبعي هتجري تغيريله وتنظفي وعلي ما ترجعي تكملي اللي كنتي بتعمليه هتلاقي نفسك دخلتي في نفس الدوامة تاني وده هيسببلك ضغط ويخليكي عصبية وبتزعقي في ابنك وهو يا حبيبي ملوش ذنب هو طفل لسة بيتعلم

فحاولي تعتبري نفسك في فترة اجازة من كل حاجة تقدري تأجليها او تعمليها قبل ما تبدأي وتستمتعي بس بأبنك وهو بيكبر قدامك وبيتعلم البوتي ترينينج وسجلي اللحظات الحلوة والمضحكة اللي بتحصل في الفترة دي وبدل ما تبقي فترة تقيلة ومملة خليها جميلة وممتعة ليكوا كلكوا

وفي النهاية عايزة اقولك انتي أم بطلة وبتعملي مهمة عظيمة اوعي تصدقي اي حد بيقولك هو انتي بتعملي ايه اصلا، ومتنسيش تشكري نفسك وتكافئيها وخدي وقت ترتاحي فيه وتشحني طاقتك علشان تقدري تكملي في دورك العظيم اللي ربنا اختارك ليه… واستمتعي بكل لحظة مع اولادك 

10 posts

About author
Professional Organizer and Time Management Coach https://www.facebook.com/groups/332587367147945/?ref=share
Articles
Related posts
EntertainmentKids

كيف استمتع بالعيد وأملأ قلبي بالفرحة

عيد الاضحي عالابواب كل عام والأمة الإسلامية بخير وصحة وسعادة يارب كلنا بعد ما كبرنا بقينا نقول احنا مش حاسين بفرحة العيد زي زمان لما…
BabiesKidsMotherhoodTeenagersToddlers

What is albinism?

In the occasion of albinism awareness day (June 13), let’s praise our difference. The strength of humankind relies is our differences. Our differences are due…
KidsMotherhoodPregnancyTeenagersToddlers

How to stay hydrated in summer?

With hot summer days on the door, it’s important that we adults and kids keep a good eye on our hydration. Whether you are staying…
Power your life with Motherstalk
[[[["field6","contains","Other"]],[["show_fields","field8"]],"and"]]
1 Step 1
keyboard_arrow_leftPrevious
Nextkeyboard_arrow_right

Leave a Reply

Your email address will not be published. Required fields are marked *