Kids

كيف أعلم طفلي مهارة تنظيم وإدارة الوقت

أمهات كتير بتشتكي من ان الاولاد بيقضوا معظم وقتهم عالموبايل او قدام التليفزيون.. وده طبعا بيأثر علي نظرهم وعلي عدم نمو وتطور مهاراتهم المختلفة … وطبعا الجملة الشهيرة “معندهمش اي احساس بقيمة الوقت” وخصوصا في وقت الدراسة

 

ومن هنا تأتي أهمية تعليم الأطفال مهارة تنظيم وإدارة الوقت وده اللي هنتكلم عنه في المقالة دي  بإذن الله

 

ليه ابني مش حاسس بقيمة الوقت

اولادنا لو سنهم صغير مش بيكونوا فاهمين يعني ايه نص ساعة ولا خمس دقايق ولا بيمثلوا وقت قد ايه ولا مدركين اصلا احنا الساعة كام دلوقتي وفاضل قد ايه واليوم يخلص.. فهما محتاجين حاجات بسيطة تساعدهم يعرفوا الخمس دقايق دول بيخلصوا امتي لو هما لسة صغيرين ممكن نجيبلهم ساعة رملية بتكون فيها اوقات مختلفة ولما تقوليله قدامك ربع ساعة مثلا هيفهم انها هتخلص لما الرمل ده يخلص وطول ما الرمل قدامه بينزل هيكون عارف فاضل قد ايه

ولو الطفل اكبر شوية وبيعرف يقرأ الارقام تبدأي تخليه يستخدم الساعة او المنبه وممكن نظبط التايمر

قائمة المهام وترتيب الأولويات

وهنا هنبدأ نقعد مع الطفل ونخليه يكتب او نكتبله احنا لو لسة صغير او نرسمله علشان يفهم من الرسم الحاجات اللي وراه يعملها النهارده ودي بنسميها قائمة المهام اليومية وبكدة هو وقف علي أول سلمة وعرف ايه الحاجات اللي وراه النهارده

ونبدأ بعد كدة نعمل ترتيب أولويات للمهام دي

يعني هنفكر معاه ايه الحاجات المهمة اللي لازم تتعمل اول حاجة ومينفعش اليوم يخلص من غير ما نعملها ونكتبها هي في اول القائمة

بعدين المهام الأقل أهمية وهكذا

 

الحافز الذاتي والمكافأة

الطفل محتاج يتعلم مهارة ان اي حاجة بيعملها يكون الحافز علي انجازها نابع من جواه هو ، يعني مثلا لو بياكل فهو عارف انه بياكل علشان جسمه محتاج يتغذي ويكون قوي علشانه هو مش علشان بابا وماما ميزعلوش مني لأن لما يتعود يعمل علشان حد تاني يبقي لو الحد ده مش موجود مش هيعمل الحاجة دي ، لكن لو بيعملها علشان نفسه والحافز جاي من جواه هو، يبقي هيعملها دايما حتي في غياب بابا وماما

ومن هنا يجي دور الاحتفال او المكافأة

نعلم ولادنا يشكروا نفسهم علي سعيهم انهم بيحاولوا يتعلموا او بيحاولوا ينظموا وقتهم ولأي سعي بيعملوه ويحتفلوا بنفسهم  بحاجات بيحبوها سواء مادية او معنوية، يعني مثلا لو بيحب يرسم يبقي هيحتفل بنفسه انه يقعد يرسم، وممكن بعد فترة يحتفل بنفسه احتفال كبير ويجيبلها حاجة بيحبها هدية، طبعا الاحتفال ليه طرق كتير سيبيهم يفكروا هما ويكتبوا صفحة في كشكول التخطيط بتاعهم يسموها افكار للاحتفال وكل ما تجيلهم فكرة احتفال يرجعوا للصفحة دي يكتبوها، ووقت الاحتفال يختاروا منها هيحتفلوا ازاي

وده بيعزز نقطة الحافز الداخلي وانهم كمان ميبقوش بيعملوا الحاجة وهما مستنيين حد يشكرهم او يحتفل بيهم لأن هما بيحتفلوا بنفسهم وبيشكروها دايما

 

ابحثي مع طفلك عن شغفه

طفلك من وهو صغير بيمر بفترات اسمها المرحلة الحساسة ودي بتتغير كل فترة، في المرحلة دي بتلاقي الطفل مهتم وشغوف جدا بحاجة معينة زي مثلا تلاقيه بيفك الألعاب ويكتشف الدواير الكهربائية بتتعمل ازاي واللعبة دي شغالة ازاي وهكذا

انتي بقي استغلي الموضوع ده وساعديه انه ينميه زي مثلا تفتحوا فيديوهات عاليوتيوب تتعلموا اكتر عن الموضوع ده، او لو في حد في العيلة فاهم في الحاجات دي خليه يقعد معاه ويساعده، او اديله كورسات… المهم فكري بأي طريقة ازاي تشتغلي معاه عالحاجة اللي هو شغوف بيها الفترة دي

وتقبلي ان كل فترة وهو صغير شغفه واهتمامته دي بتتغير وتلاقيه نسي الحاجة اللي كان مهتم ببها قبل كدة متقوليش ده فاشل ومش بيكمل في حاجة بالعكس هو كل حاجة بيتعلم منها مهارات كتيييييييير جدا هتساعده في حياته بعد كدة

وفي مرة من المرات دي هتلاقيه اكتشف شغفه الحقيقي اللي حابب يخليه شغله بعد كدة ويكمل بيه ، ومش بعيد يدمجه مع الحاجات اللي اتعلمها قبل كدة ويطلع ميكس عمرك ما تتخيليه

ومن هنا بنصحك تهاودي ابنك وتمشي وراه ومتزهقيش لأن ده هيخليه عبقري ومش طفل عادي بإذن الله… اه انتي هتتعبي وهتفرهدي بس صدقيني هتفتخري بيه في الآخر وهتجني ثمرة تعبك بإذن الله

قنني وقت الشاشات وخلي عندك حزم برفق

طول ما ابنك ماسك التليفون او قاعد قصاد التليفزيون عمره ما هيحاول يلعب ويكتشف الحاجات اللي بيحبها ولا يعرف شغفه لأن وقته ضايع عالشاشات… لما تسيبيه قاعد زهقان من غير شاشات هتلاقيه بيلعب وبيدعبس في اي حاجة ومن هنا هيطلع منه كنوز وهيكتشف شغفه وساعتها هيعرف يستغل وقته في حاجة مفيدة ويعرف قيمة الوقت

ومن هنا يجي دورك كأم في انك تحددي وقت معين للشاشات حسب سنه ويكون عندك حزم في الموضوع ده بس حزم بحب وبرفق مش بعصبية وزعيق .. وافتكري ان الطفل هيفضل يزن في الأول يختبر صبرك بس مع الوقت هيعرف ان ماما لما بتقول حاجة مش بترجع فيها.. وبفكرك انك تعلميه يبقي عنده حافز داخلي دايما وهنا عرفيه ليه بتقولي وقت للشاشات علشان هو من نفسه بعد كدة يعمل كدة.. عرفيه اضرار الشاشات وادخلوا سوا عالنت اعملوا سيرش،، عرفيه انه لما يسيبهم هيلاقي حاجات احلي كتير يعملها ويتعلمها

خليكي قدوة ليهم

افتكري دايما ان الاطفال بيراقبوا أفعالنا دايما وبيقلدونا في كل حاجة، فمينفعش تقوليله سيب الموبايل وانتي مسكاه علطول… كمان لما يلاقيكي منظمه وقتك وعندك كراسة بتخططي فيها هتلاقيه عايز من نفسه يقلدك ويعمل زيك ، وساعتها نصيحة اعمليله كراسة تخطيط علي قد سنه واتكلمي قدامه بطريقه غير مباشرة عن حاجات اتعلمتيها وبتساعدك في تنظيم وقتك وفي التخطيط لحياتك

وفي النهاية احب اقولك ان طريق التربية مش سهل ومحتاج مجهود كبير وانك أم بطلة وبتحاولي تعملي اللي ربنا يقدرك عليه ولازم انتي كمان تشكري نفسك وتحتفلي بيها دايما .. وافتكري تاخدي خطوات نونو مع نفسك ومع اولادك ومتضغطيش نفسك ولا تضغطيهم .. واستمتعوا بأحلي لحظات في حياتكم واشبعي منهم ومن حضنهم

6 posts

About author
Professional Organizer and Time Management Coach https://www.facebook.com/groups/332587367147945/?ref=share
Articles
Related posts
BabiesKidsMotherhoodPregnancy

What is trisomy?

With the advance of science, Walther Flemming discovered in 1882 that our genetic material is carried by a thread-like structure found in our cells called…
BabiesFather's RoleKidsMarriageMotherhoodPregnancySingle ParentsTeenagersToddlers

Bullying is REAL 💔😢

Is your child being bullied? Do you recognise the different types of bullying? Do you know what action to take?  Any child can be bullied…
BabiesFather's RoleKidsMotherhoodSingle Parents

التربية الإيجابية و أخطاء شائعة

إنتشرت في أواخر الثلاثين عام الماضية ما يسمى بالتربية الإيجابية حيث كانت المتبنية لأفكارها و منهجيتها “جاين نيلسون” متأثرةً بفكر “أدلر” و تلميذه “دريكرز”. بدأ…
Power your life with Motherstalk
[[[["field6","contains","Other"]],[["show_fields","field8"]],"and"]]
1 Step 1
keyboard_arrow_leftPrevious
Nextkeyboard_arrow_right

Leave a Reply

Your email address will not be published. Required fields are marked *