CookingMotherhood

كيف أستعد لإستقبال شهر رمضان الكريم

رمضان عالابواب كل عام وانتم بخير

كتير مننا بيحتار المفروض استعد ازاي لرمضان لدرجة انه بيبدأ ويخلص ونلاقي نفسنا معملناش اي حاجة

في المقال ده هساعدك تستعدي لاستقبال شهر  رمضان الكريم بسبع خطوات

لكن في الأول انتي محتاجة تجيبي ورقة وقلم

وابدأي اكتبي فيها كل الافكار اللي في دماغك والحاجات اللي عايزة تعمليها بخصوص رمضان وقسميها لحاجات هتتعمل قبل رمضان واثناء رمضان وفي العيد

بمعني اصح انتي بتفضي دماغك علي ورقع علشان بعد كدة تقدري تطلعي بخطة لرمضان


 يالا نشوف السبع خطوات اللي هنستعد بيهم لرمضان

أولا: فضل رمضان

أول وأهم حاجة محتاجة تراجعي معلوماتك عن فضل شهر رمضان الكريم عن طريق السيرش عن فيديوهات عاليوتيوب، او قراءة كتب ،او مقالات ، او اي طريقة اخري بتفضليها

أهمية الخطوة دي انها بتساعدك تتحمسي تاخدي خطوات وتنفذيها ومتكسليش لأنك عارفة ايه الحافز اللي هيحركك وهو فضل الشهر الكريم

كمان هتديلك افكار عن العبادات اللي ممكن تعمليها سواء لوحدك أو مع أسرتك أو اطفالك أو اقاربك أو المجتمع

وتبدأي تتدرجي في العبادات من دلوقتي علشان تكون سخنتي قبل رمضان وتنطلقي في رمضان

ثانيا: التخطيط

اكتبي أهدافك اللي قررتي تشتغلي عليها في شهر رمضان وقبله وبعده وتحددي وقت لكل مهمة لأن التخطيط ووضع الأهداف بدون تنفيذ هو تضييع وقت بلا فائدة.

ثالثا: اكلات رمضان

  1. كتابة منيو اكلات شهر رمضان
  2. وقائمة المشتريات اللي محتاجاها
  3. وشراء كل طلبات الشهر
  4. وعمل تحضيرات الاكل اللي هتوفر عليكي الوقت والمجهود في رمضان

 ودي شوية افكار اعملي منها المناسب لجدول اكلاتك

  • افرمي كمية بصل وحطيها في كيس وبططيها أو في علبة وشيليها في الفريزر
  • والثوم بنفس الطريقة
  • وكذلك الطماطم اعمليها صلصة واحفظيها بنفس الطريقة
  • وصلصه خاصه للمكرونه
  • صلصه محشي مضاف عليها الخضرا بس ووقت الحشو نضيف الرز وعالحشو علطول
  • الخضار هاتيه ونظفيه واحفظيه في الفريزر
  • وتفرير قلقاس وتفريز السلق بتاعه
  • اعملي برجر وكفتة وبانية وبفتيك وشيليهم جاهزين عالتسوية
  • وكفتة أرز متصبعه ومتحمره وتبقي جاهزه عالصلصه علطول
  • تتبيل فراخ صحيحة وشيش طاووق وشاورما لحم وفراخ
  • سمبوسك محشيه عالقلي
  • ممبار محشي ومستوى عالتحمير
  • لحمه متبله جاهزه عالشوي
  • لحمه متعصجه جاهزه للرقاق والجلاش

 

رابعا : تنظيف المنزل

اعملي التنظيف العميق للمنزل قبل رمضان

علشان بردو توفري وقتك وطاقتك في رمضان ، ويبقي التنظيف البسيط هو اللي مستمر معاكي ومتحتاجيش بردو في آخر رمضان تعملي ما يدعي تنظيفة العيد اللي لو حافظنا علي بيتنا نظيف أول بأول مش هيتهد حيلنا في تنظيفة العيد دي وهتكون بسيطة جدا مش بتاخد وقت ولا مجهود

خامسا : تزيين المنزل

تزيين المنزل لاستقبال رمضان وادخال جو البهجة عليكي و علي اسرتك

خلي الاولاد يشاركوكي في افكار تزيين البيت وتنفيذها وده هيعمل جو روحاني وبهجة والولاد والكبار هيتبسطوا وهتبقي طقوس عندهم تخليهم ينتظروا رمضان من السنة للسنة

سادسا : برامج ومسلسلات رمضان

ابدأي شوفي ايه البرامج اللي حابة تتابعيها في رمضان واوقاتها ايه وياريت لا تكثري من متابعة البرامج والمسلسلات في رمضان لأن رمضان شهر عبادة مش عايزين نضيعه في ملهيات تضيع علينا فرص جبال من الحسنات

ولما تقرري البرامج اللي هتتابعيها الافضل تشوفيها عالنت في الوقت المناسب ليكي وكمان هتوفري وقت الإعلانات اللي بتيجي عالتليفزيون

سابعا : الاحتفال بالعيد

خططي هتحتفلي ازاي بالعيد من دلوقتي علشان ميجيش العيد ويخلص بردو من غير ما تكوني فكرتي هتعملي فيه ايه

فكري هجيب هدايا ايه للاولاد في العيد ولبس العيد لو تقدري تجيبيه من قبل رمضان لأن رمضان بيكون زحمة جدا وبنضيع وقت كبير فيه علشان نشتري لبس العيد وغالبا بنعمل ده في العشر الأواخر من رمضان اللي خسارة نضيعهم وهم فيهم ليلة القدر

فكري هتخرجوا تحتفلوا فين وهتزوروا مين

وكل عام وانتم بخير ويارب يبلغنا جميعا رمضان في أتم صحة وعافية

6 posts

About author
Professional Organizer and Time Management Coach https://www.facebook.com/groups/332587367147945/?ref=share
Articles
Related posts
BabiesKidsMotherhoodPregnancy

What is trisomy?

With the advance of science, Walther Flemming discovered in 1882 that our genetic material is carried by a thread-like structure found in our cells called…
BabiesFather's RoleKidsMarriageMotherhoodPregnancySingle ParentsTeenagersToddlers

Bullying is REAL 💔😢

Is your child being bullied? Do you recognise the different types of bullying? Do you know what action to take?  Any child can be bullied…
MarriageMotherhoodSingle Parents

ازاي اهدي من عصبيتي؟ ابسط الطرق للتقليل من العصبية

ازاي اهدي من عصبيتي؟ ابسط الطرق للتقليل من العصبية كلنا بيجلنا اوقات بنتعصب على ولادنا اكتر من اللازم و ده بيسبب آثر سيء في نفسيتهم…
Power your life with Motherstalk
[[[["field6","contains","Other"]],[["show_fields","field8"]],"and"]]
1 Step 1
keyboard_arrow_leftPrevious
Nextkeyboard_arrow_right

Leave a Reply

Your email address will not be published. Required fields are marked *