دايما بنسمع مقولة الأم لازم تضحي علشان ولادها..
ودايما بتشوف الام نفسها لازم تكون شمعة تحترق من اجل الآخرين..
بس الحقيقة انك فعلا هتتحرقي وهتخلصي ومش هيكون عندك لا طاقة ولا جهد تهتمي بأولادك الاهتمام اللي محتاجينوا منك بجد
ولادك مش عايزين تضيعي عمرك في ترويق الشقة وعمل الاكل المحمر والمشمر وتودي تمارين وتجيبي من تمارين
ولادك محتاجينك انتي يا مامي ..محتاجين يحسوا بحبك وحنانك.. محتاجينك تقعدي تلعبي معاهم وتستمتعي بيهم بجد
وعلشان تقدري تعملي ده لازم تكوني بتهتمي بنفسك الاول علشان تقدري تهتمي بيهم
خليكي شمس بتضيء حياة اللي حواليها ، مش شمعة تحترق من اجل الآخرين وتخلص
لما بنركب الطيارة من التعليمات ان لو حصل لاقدر الله حاجة الأم تلبس هي ماسك الاوكسجين الاول وبعدين تلبس اولادها… لأن تخيلي كدة لو بدأت تلبس ولادها الاول ممكن متلحقش وساعتها هتخسر نفسها وولادها
علشان كدة بقولك اهتمي بنفسك الاول لأن لما تهتمي بنفسك هتكوني كلك حيوية ونشاط وبتشعي طاقة ايجابية وبتنقليها لأولادك ونفسيتهم هتكون سعيدة لأن مامي مبسوطة وبالتالي بتملانا حب وانبساط وطاقة وسعادة ولعب وحنان.
فكري دايما تغذي 4 جوانب اساسية عندك:
1)القلب: شوفي ايه بتعمليه بيسعد قلبك مثال هوايات، اصدقاء …
2) العقل: نمي عقلك دايما سواء بالقراءة او التعلم او غيره علشان متحسيش انك متأخرة وولادك محتاجين مامي تكون ذكية ومتطورة ومواكبة للعصر.
3) الروح : اعملي حاجات روحانية تملا روحك سواء بقربك من ربنا والعبادات او الميديتيشن والتأمل وغيرهم.
4)الجسد: اهتمي بجسمك وشوفيه محتاج ايه واسمعيله واشتغلي علي الحاجة اللي محتاجها منك.. سواء رياضة او نوم كافي او اكل صحي او غيره
وفي النهاية بفكرك تقعدي مع نفسك كل اسبوع وقت مخصص ليكي لوحدك ومعاكي اجندتك الجميلة وتفكري ازاي هملي ال 4 جوانب دي خلال الاسبوع وتكتبي افكار
وكمان تشوفي هتقضي
Special time
مع كل حد من ولادك امتي
وانتي متفرغة تماما ليه هو وبس وهدفك الأساسي تستمعوا بجد ببعض وتقربوا اكتر من بعض وتسيبي الموبايل واي مشتتات في الوقت ده.
وافتكري دايما ان اللي بتزرعيه دلوقتي في اولادك بكرة لما يكبروا هتحصديه…
زرعتي حب ورعاية واهتمام ووقت خاص بيكوا تستمتعوا فيه سوا هيعملوا كل ده معاكي لما يكبروا ان شاء الله ولما تحسي انك محتاجاهم بجد هتلاقيهم جمبك.
لكن لو زرعتي انشغال عنهم وعصبية وزعيق وضرب وإهمال ليهم ولنفسك هتحصدي اهمال ليكي منهم لأنهم اتعودوا منك علي كدة .. وكل واحد هيكون ليه حياته الخاصة بعيد عنك لأنك دايما كنتي مشغولة عنهم.
القرار ليكي ياتري هتختارتي ايه ؟؟!!!!
وطبعا التغيير مش سهل.. ابدأي فكري هبدأ آخد خطوات نونو ايه في اتجاه التغيير اللي عايزة احققه
وابدأي نفذي علطول بدون تردد
وافتكري انك مش محتاجة تكوني سوبر مامي
